ಪಾಕಿಸ್ತಾನದಲ್ಲಿ 450 ಪ್ರಯಾಣಿಕರಿದ್ದ ರೈಲನ್ನೇ ಹೈಜಾಕ್‌ ಮಾಡಿದ ಉಗ್ರರು, ಕಾರ್ಯಾಚರಣೆಯಲ್ಲಿ 6 ಸೇನಾ ಸಿಬ್ಬಂದಿ ಹತ

ಬಲೂಚ್ ಲಿಬರೇಶನ್ ಆರ್ಮಿ (ಬಿಎಲ್ಎ) ಗೆ ಸೇರಿದ ಸಶಸ್ತ್ರ ಉಗ್ರರು ಮಂಗಳವಾರ ಪಾಕಿಸ್ತಾನದ ಪ್ರಕ್ಷುಬ್ಧ ಪರ್ವತ ಪ್ರದೇಶದಲ್ಲಿ ರೈಲಿಗೆ ನುಗ್ಗಿ ಹಲವಾರು ಪ್ರಯಾಣಿಕರನ್ನು ಒತ್ತೆಯಾಳುಗಳಾಗಿ ತೆಗೆದುಕೊಂಡಿದ್ದಾರೆ. ಅಫ್ಘಾನಿಸ್ತಾನ ಮತ್ತು ಇರಾನ್ ಗಡಿಯಲ್ಲಿರುವ ಬಲೂಚಿಸ್ತಾನ್ ಪ್ರಾಂತ್ಯಕ್ಕೆ ಸ್ವಾತಂತ್ರ್ಯವನ್ನು ಬಯಸುವ ಬಿಎಲ್ಎ ಪಡೆ ಈಗಾಗಲೇ ಹಲವು ಸೈನಿಕರನ್ನು ಕೊಂದಿದೆ. ಡ್ರೋನ್ ಅನ್ನು ಹೊಡೆದುರುಳಿಸಿದೆ ಎಂದು ರಾಯಿಟರ್ಸ್ ವರದಿ ಮಾಡಿದೆ. ನಾಗರಿಕ ಪ್ರಯಾಣಿಕರು, ವಿಶೇಷವಾಗಿ ಮಹಿಳೆಯರು, ಮಕ್ಕಳು, ವೃದ್ಧರು ಮತ್ತು ಬಲೂಚ್ ನಾಗರಿಕರನ್ನು ಸುರಕ್ಷಿತವಾಗಿ ಬಿಡುಗಡೆ ಮಾಡಲಾಗಿದೆ . 450 ಮಂದಿಯಲ್ಲಿ ಈ ಗುಂಪು ಸದ್ಯ 182 ಮಂದಿಯನ್ನು ಒತ್ತೆಯಾಳುಗಳನ್ನಾಗಿ ತೆಗೆದುಕೊಂಡಿದೆ ಎಂದು ಹೇಳಿಕೊಂಡಿದೆ.