ಬದಲಾಗದ ಪಾಕಿಸ್ತಾನ ತಂಡದ ಹಣೆಬರಹ; ನ್ಯೂಜಿಲೆಂಡ್ ವಿರುದ್ಧ 2ನೇ ಟಿ20ಐನಲ್ಲೂ ಸೋಲು, ಸರಣಿ ಕಳೆದುಕೊಳ್ಳುವ ಭೀತಿ
ಬದಲಾಗದ ಪಾಕಿಸ್ತಾನ ತಂಡದ ಹಣೆಬರಹ
ಪಾಕಿಸ್ತಾನ ತಂಡ ಹಣೆಬರಹವೇ ಬದಲಾಗುತ್ತಿಲ್ಲ. ನಾಯಕರು ಬದಲಾದರು, ಕೋಚ್ಗಳು ಬದಲಾದರು, ಆಟಗಾರರು ಬದಲಾದರು, ಕ್ರಿಕೆಟ್ ಮಂಡಳಿ ಸದಸ್ಯರು ಬದಲಾದರು.. ಹೀಗಿದ್ದರೂ ತಂಡದ ಹಣೆಬರಹ ಬದಲಾಗಲಿಲ್ಲ. 2023ರ ಏಷ್ಯಾಕಪ್ನಿಂದ ಇಲ್ಲಿಯ ತನಕ ಗೆದ್ದಿದ್ದೇ ಕಡಿಮೆ ಪಂದ್ಯಗಳಲ್ಲಿ. ಏಷ್ಯಾಕಪ್ ಕಳೆದುಕೊಂಡ ಪಾಕ್, ಅದೇ ವರ್ಷ ನಡೆದ ಏಕದಿನ ವಿಶ್ವಕಪ್ನಲ್ಲೂ ಹೀನಾಯ ಪ್ರದರ್ಶನದೊಂದಿಗೆ ಟೂರ್ನಿಯಿಂದ ಹೊರಬಿತ್ತು. ಆ ಬಳಿಕ ನಡೆದ ಸರಣಿಗಳಲ್ಲೂ ಅಂದುಕೊಂಡಂತೆ ಪ್ರದರ್ಶನ ನೀಡಲಿಲ್ಲ. ಟಿ20 ವಿಶ್ವಕಪ್ನಲ್ಲಿ ಅಮೆರಿಕ ವಿರುದ್ಧ ಸೋತಿದ್ದೂ ಸೇರಿದಂತೆ ಲೀಗ್ನಲ್ಲೇ ಹೊರಬಿತ್ತು. ಡಬ್ಲ್ಯುಟಿಸಿ ಅಂಕಪಟ್ಟಿಯಲ್ಲೂ 9ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತು. ತವರಿನಲ್ಲಿ ನಡೆದ ಚಾಂಪಿಯನ್ಸ್ ಟ್ರೋಫಿಯಲ್ಲೂ ಲೀಗ್ನಲ್ಲೇ ಹೊರಬಿತ್ತು. ಟೆಸ್ಟ್ನಲ್ಲಿ ಇಂಗ್ಲೆಂಡ್ ವಿರುದ್ಧ ಸರಣಿ, ಏಕದಿನದಲ್ಲಿ ಆಸ್ಟ್ರೇಲಿಯಾ, ಜಿಂಬಾಬ್ವೆ ವಿರುದ್ದ ಸರಣಿ, ಟಿ20ಯಲ್ಲಿ ಜಿಂಬಾಬ್ವೆ ವಿರುದ್ಧ ಸರಣಿ ಗೆದ್ದಿದ್ದು ಬಿಟ್ಟರೆ, ಉಳಿದಂತೆ ಸತತ ಸೋಲುಗಳನ್ನು ಎದುರಿಸಿದೆ. ಇದೀಗ ಕಿವೀಸ್ ವಿರುದ್ಧ ಸರಣಿ ಕಳೆದುಕೊಳ್ಳುವ ಭೀತಿಗೆ ಸಿಲುಕಿದೆ.
