ಭಾರತದ ವಿರುದ್ಧ 4 ಟೆಸ್ಟ್​​​ ಪಂದ್ಯಗಳಲ್ಲಿ 3ನೇ ಶತಕ, ಮತ್ತೆ ತಲೆನೋವಾದ ಟ್ರಾವಿಸ್ ಹೆಡ್; 100 ಸಮೀಪಿಸಿದ ಬ್ಯಾಟಿಂಗ್ ಸರಾಸರಿ

ಬಾರ್ಡರ್ ಗವಾಸ್ಕರ್​ ಟ್ರೋಫಿಯ ಮೂರನೇ ಟೆಸ್ಟ್​ ಪಂದ್ಯದಲ್ಲೂ ಆಸ್ಟ್ರೇಲಿಯಾದ ಸ್ಟಾರ್ ಬ್ಯಾಟರ್ ಟ್ರಾವಿಸ್ ಹೆಡ್, ಶತಕ ಸಿಡಿಸಿ ಭಾರತ ತಂಡಕ್ಕೆ ಮತ್ತೆ ತಲೆನೋವಾಗಿ ಪರಿಣಮಿಸಿದ್ದಾರೆ. ಪಿಂಕ್ ಬಾಲ್ ಟೆಸ್ಟ್​ನಲ್ಲಿ​ ಭರ್ಜರಿ ಸೆಂಚುರಿ ಸಿಡಿಸಿ ರೋಹಿತ್​ ಪಡೆಯ ಸೋಲಿಗೆ ಕಾರಣಕರ್ತರಾಗಿದ್ದ ಹೆಡ್​, ಬ್ರಿಸ್ಬೇನ್​​ ಟೆಸ್ಟ್​​ನಲ್ಲೂ ಮೂರಂಕಿ ದಾಟಿದ್ದು, ಪ್ರಥಮ ಇನ್ನಿಂಗ್ಸ್​​ನಲ್ಲಿ ಬೃಹತ್ ಮೊತ್ತ ಕಲೆ ಹಾಕಲು ನೆರವಾಗಿದ್ದಾರೆ. ಐದನೇ ಕ್ರಮಾಂಕದಲ್ಲಿ ಕಣಕ್ಕಿಳಿದು ಬಿರುಗಾಳಿ ಬ್ಯಾಟಿಂಗ್ ನಡೆಸಿದ ಹೆಡ್, 160 ಎಸೆತಗಳಲ್ಲಿ 18 ಬೌಂಡರಿ ಸಹಿತ 152 ರನ್ ಗಳಿಸುವ ಮೂಲಕ ಗಮನ ಸೆಳೆದಿದ್ದಾರೆ. ಟೀಮ್ ಇಂಡಿಯಾ ವಿರುದ್ಧ ಕೊನೆಯ 4 ಟೆಸ್ಟ್​​​ ಪಂದ್ಯಗಳಲ್ಲಿ ಹೆಡ್​, ಮೂರನೇ ಶತಕ ಸಿಡಿಸಿದ್ದಾರೆ. ಇದು ಭಾರತದ ವಿರುದ್ಧ ಸತತ 2ನೇ ಹಾಗೂ ಒಟ್ಟು 3ನೇ ಟೆಸ್ಟ್​ ಶತಕ.