ಕಟಕ್​​ನಲ್ಲಿ ರೋಹಿತ್​ ಶರ್ಮಾ ಅಟ್ಯಾಕ್; 2ನೇ ಏಕದಿನದಲ್ಲೂ ಇಂಗ್ಲೆಂಡ್ ಸೋಲಿಸಿ ಸರಣಿಗೆ ಮುತ್ತಿಕ್ಕಿದ ಭಾರತ

ರೋಹಿತ್​ ಶರ್ಮಾ (119) ಅವರ ಶತಕ ವೈಭವದಿಂದ ಭಾರತ ತಂಡ ಎರಡನೇ ಏಕದಿನ ಪಂದ್ಯದಲ್ಲೂ ಅಮೋಘ ಗೆಲುವು ಸಾಧಿಸಿದೆ. ಒಂದು ಪಂದ್ಯ ಬಾಕಿ ಇರುವಂತೆ ಮೂರು ಪಂದ್ಯಗಳ ಏಕದಿನ ಸರಣಿಯನ್ನು 2-0 ಅಂತರದಿಂದ ವಶಪಡಿಸಿಕೊಂಡಿದೆ. ಟಿ20 ಸರಣಿ ಸೋಲಿನ ಬಳಿಕ ಒಡಿಐ ಸಿರೀಸ್​​ನಲ್ಲಿ ಪುಟಿದೇಳುವ ಲೆಕ್ಕಾಚಾರ ಹಾಕಿಕೊಂಡಿದ್ದ ಇಂಗ್ಲೆಂಡ್​ ಉತ್ತಮ ಪ್ರದರ್ಶನ ನಡುವೆಯೂ ಮತ್ತೊಮ್ಮೆ ಮುಖಭಂಗಕ್ಕೆ ಒಳಗಾಗಿದೆ. ಕಟಕ್​ನ ಬಾರಾಬತಿ ಕ್ರಿಕೆಟ್​ ಮೈದಾನದಲ್ಲೂ ನಾಲ್ಕು ವಿಕೆಟ್​ಗಳಿಂದಲೇ ಜಯಭೇರಿ ಬಾರಿಸಿರುವ ಭಾರತ, ಇನ್ನೂ 33 ಎಸೆತಗಳನ್ನು ಉಳಿಸಿಯೇ ಚೇಸ್ ಮಾಡಿದೆ. ಮೊದಲು ಬ್ಯಾಟಿಂಗ್ ನಡೆಸಿದ ಇಂಗ್ಲೆಂಡ್ 49.5 ಓವರ್​ಗಳಲ್ಲಿ 304 ರನ್​ಗಳಿಸಿ ಆಲೌಟ್ ಆಯಿತು. ಈ ಗುರಿ ಬೆನ್ನಟ್ಟಿದ ಭಾರತ 6 ವಿಕೆಟ್ ನಷ್ಟಕ್ಕೆ 44.3 ಓವರ್​ಗಳಲ್ಲಿ 308 ರನ್ ಗಳಿಸಿತು.